沽空機構狙擊套路

要數美國英雄漫畫的經典icon（代表）人物，DC漫畫的蝙蝠俠是其中之一。在蝙蝠俠居住的虛擬罪惡城市葛咸城竟然「發現」一間沽空機構，葛咸城研究（Gotham City Research）首度狙擊本港上市公司，這個話題夠juicy兼有gimmick，原定刊登的「資本系」文章只好暫時「讓路」。

高仁與「豬朋狗友」在飯局「切磋」（高仁註：既是「切磋」飲食知識，也是「切磋」財技招數），就總結出沽空機構在狙擊上市公司之前，其實有一貫調查公司的「套路」。

在披露對話實錄之前，請各位「巴打」與「絲打」重溫人物背景，簡介如下：

戴孤劃──又稱「戴Sir」，《信報》「蠱壇辨虛實」專欄作家、上市公司大股東，經常欺壓小股東。

程更計──本地證券行經紀兼財務顧問，除了招呼散戶之外，亦向上市公司出謀獻計。

戴孤劃：高仁，你係第一個喺《信報》連續撰寫財經拆局專欄7年嘅「鐵哥」，多年來揭露上市公司嘅財技蠱惑招數，贏盡晒香港「鐵哥們」嘅讚賞。近日，「鐵哥們」聞所未聞嘅沽空機構，狙擊新晉藍籌瑞聲科技（02018），你點睇呀？

高仁：首先多謝「巴打」們嘅支持。其實，上市公司施展嘅財技蠱惑招數，以至沽空機構狙擊上市公司嘅調查，就好似金庸小說咁有一貫嘅「套路」嘅。

程更計：冇錯！沽空機構選定狙擊目標之後，一定會查閱各式各樣嘅公開資料，例如招股書、年報、公告、官方網站、媒體報道等等，再順藤摸瓜延伸搜尋其他資料。如果公司造假作故仔，要疏通晒所有對口單位，成本將會非常之高。沽空機構搵公開資料做對比，好容易會搵到矛盾嘅地方。

戴孤劃：（突然轉用普通話）是的！公司老總要造假，就一定要找「鐵哥們」幫忙，「關聯方」一般都是掏空公司的好幫手啊！當然「關聯方」不可能是大股東等關聯人士，而是表面上沒有任何關聯，但實際上聽命於老總的人，最終目的就是要左手交右手啊！

重視實地盡職審查

程更計：我知道沽空機構亦會透過管理層電話訪問或見面攞料，但就更加重視實地DD（Due Diligence，盡職審查），尤其是睇廠周圍嘅環境、機器設備、存貨、同工人及工廠周圍嘅居民傾偈，了解公司嘅實際營運情況，同公司發布嘅資料做比較。

戴孤劃：（又轉用普通話，微笑地說）我在內地認識女朋友時也會做足DD啊！

高仁：戴Sir同阿程似乎都幾熟沽空機構嘅「套路」喎！除此之外，沽空機構會調查埋公司嘅上下游，例如上游供應商嘅產能、銷量同售價等經營數據，以及下游客戶嘅實際採購量、購買價格及對公司產品嘅評價，以判斷公司有冇誇大收入。

程更計：最熟悉公司嘅行業情況，一定係其競爭對手，以至行業專家。所以，沽空機構往往會參考競爭對手嘅經營同財務狀況，以及請教行業專家嘅意見，以判斷公司嘅價值。

高仁：最後，沽空機構會根據調查獲得嘅資料，重新估計公司嘅資產同業務價值，但由於其以沽空公司股票為目的，可能會刻意低估公司嘅價值，甚至把公司評為一文不值，務求可以達致利潤最大化。上述嘅調查工作就係狙擊上市公司嘅「套路」。

戴孤劃：話時話，點解上次渾水研究（Muddy Waters Research）狙擊輝山乳業（06863），要直到最近公司先疑似爆煲呢？

高仁：戴Sir、程更計，等我飲啖茶、食個包，一陣再話你哋知。

Just to say Hi