錯而不改股神抵輸 2020年6月5日 畢老林

2020年6月5日

畢老林 投資者日記

錯而不改股神抵輸

6月4日，周四。好的投資者與壞的投資者最大分別不在輸贏，而是懂不懂從錯誤中汲取教訓。賺得多當然好，但幾分眼光幾分運難說得很。輸無妨，最緊要知道點解，避免一錯再錯。錯而不改，投資大忌也。諷刺的是，最成功的投資者也有盲點，大忌一犯再犯。說的是誰？之唔係股神畢非德囉。

有人根據巴郡向美國證券及交易委員會（SEC）的申報幫畢翁計過數，巴郡近年最大的三項投資一敗塗地，共蝕70億美元。哪三項？最早是2013年夥拍私募基金3G Capital斥資232億美元買入茄汁製造商亨氏（H.J. Heinz），兩年後亨氏以540億美元收購食品集團卡夫（Kraft Foods），合併後稱作卡夫亨氏。

第二項是去年8月動用100億美元押注西方石油（Occidental Petroleum），得股神之助，西方石油擊退雪佛龍，以380億美元收購Anadarko Petroleum，一躍而成美國最大頁岩油商。

第三項人盡皆知，巴郡於2016年中至2017年初密密吸納美國四大般空公司股份，頭頭尾尾耗資90多億美元。股神都係人一個，輸錢很平常。問題是，向來無寶不落的他，究竟知唔知點解輸？老畢認為，可歸因於兩大盲點：一、與時代脫節；二、錯而不改。

卡夫亨氏去年為旗下Kraft和Oscar Mayer兩個品牌撇賬150億美元，巴郡隨即為這項投資減值30億美元。今年2月，標準普爾及惠譽把卡夫亨氏的信貸評級降至垃圾級別。

SEC的申報裁至3月31日，巴郡持股價值約80億美元，較買入時低20億美元。

與時代脫節

股神此役本應滴水不漏，亨氏和卡夫無人不識，亨氏茄汁、卡夫芝士，你屋企雪櫃都應該放唔少。巴郡於2013年出手，即不少人視為美股「真．牛市」起步之時，皆因標指該年升穿2007年高位破頂，此後一去不回頭（最多嚇你一嚇），按理說時機一流。

萬料不到，卡夫亨氏只在巴郡買入後頭兩年沾到牛市一點點光彩，自此一沉不起，股神揸咁耐衰咁耐。跑輸唔出奇，但人升你跌就大有問題。原因？正是前面提及的盲點一。

畢非德年近九旬，漢堡包當飯食、可樂當水飲眾所周知，但一代還一代，股神細路仔時當寶嘅大品牌包裝食品，千禧世代已經當草。卡夫亨氏雙劍合璧，本屬強強聯手，正合講究「護城河」的畢翁口味，何況美股隻牛當時剛出閘，邊有得輸？時代變了，消費潮流就不一樣。

聽股神一面承認在這項投資上犯了錯，一面歸咎於買入價太高，便知畢翁頂多只怨買貴，始終唔認買錯，同時代脫咗節都唔知。七年牛市居然要輸，豈是一聲「買貴」解釋得了。

協助西方石油拿下Anadarko這一戰，碰正油市谷底掙扎，今年油價一度跌到三魂唔見七魄，西方石油大削股息86%，股神再度中箭。

這宗交易還附有10萬股年息8厘的優先股，西方石油股價若跌至特定水平，巴郡有權以股代息，結果4月變相加倉，算做趁低吸納吧。

SEC申報顯示，去年交易完成時西方石油股價為44美元，今年3月31日收報11.58美元，執筆時造15.24美元。

以後者為準，三蚊唔見兩蚊。能源板塊本就難玩，畢翁勇於向難度挑戰，但如此戰績，賴時機掌握欠佳已畀足面股神了。

講一套做一套

比起第三筆，前兩筆其實算不了什麼。在下指的並非虧蝕銀碼，關鍵乃前述第二個盲點。航空業遭瘟疫蹂躪非始料所及，惟畢非德三番四次勸人切勿沾手航空股，還狠咒這個板塊乃「投資者的死亡陷阱」（a death trap for investors），自己卻一而再、再而三墮入陷阱，咁仲唔係錯而不改？

違反教訓別人的一套未算最壞，打從巴郡1989年入股USAir以來，股神每隔幾年便忍唔住要咒航空業，但講一套做一套，掃航空股唔止一家、兩家、三家，一掃就掃夠四家，今年4月見底時一次過清倉。有口勸人冇口勸自己，抵輸。